ق ر تۇڭعىش پرەزيدەنتى ن.نازاربايەۆتىڭ تاپسىرماسىنا سايكەس  «ەل ءۇمىتى» باستاماسى اياسىندا «ەلباسى اكادەمياسى»  كورپوراتيۆتىك قورى جۇزەگە اسىراتىن «ەلباسى مەدالى» جوباسى تۋرالى قوعامدىق كوممۋنيكاسيا ورتالىعىندا وتكەن بريفينگتە ءمالىم بولدى.

اتالعان باعدارلامانىڭ نەگىزگى سيمۆولى - جەتىستىكتىڭ 7 جەبەسىنە بالانعان. ول - جاسوسپىرىمدەردىڭ قابىلەتىن دامىتۋعا، جاس قازاقستاندىقتاردىڭ رۋحىن بيىك ۇستاۋعا، جاڭا ۇرپاقتىڭ باسەكەگە قابىلەتتىلىگىن ارتتىرۋعا ارنالعان 7 باعىت. بۇل  - سپورت، دارىندىلىق پەن داعدىنى دامىتۋ، كىتاپ وقۋ، ۆولونتەرلىك، ۇلتتىق مۇرا، تۋريستىك جانە جۇمىس تاجىريبەسى. ماسەلەن سپورت بولسا، ونىڭ ءتۇرىن قاتىسۋشى ءوزى تاڭدايدى.

-«باعدارلاما 14 پەن 29 جاس ارالىعىنداعى بالالار مەن جاستارعا ارنالعان. ول  ءۇش دەڭگەيدە بولادى: قولا، كۇمىس جانە التىن. قولا 14 جاستان باستاپ، كۇمىس 15 جاستان باستاپ، التىن 16 جاستان باستاپ  قاتىسۋشىلارعا بەلگىلەنەتىن بولادى.  ءار دەڭگەيدە قاتىسۋشىلاردىڭ ساباق ۇزاقتىعى مەن جيىلىگىنە قويىلاتىن تالاپتار ۇسىنىلعان. ءار دەڭگەيدە قاتىسۋشىلاردىڭ ساباقتارىنىڭ ۇزاقتىعى مەن جيىلىگىنە تالاپتار قويىلادى. قولا دەڭگەيگە جەتۋ ءۇشىن 6 اي، كۇمىسكە 12 اي جانە التىنعا 18 اي قاجەت»، - دەدى «ەلباسى مەدالى» جوباسى بويىنشا ماڭعىستاۋ وبلىسىنىڭ ۇيلەستىرۋشىسى ديدار بولتىرىك.

          «ەلباسى مەدالى» جوباسىنا جاس ەرەكشەلىگى بويىنشا كەز-كەلگەن ادام، تۇرعىلىقتى جەرىنە جانە الەۋمەتتىك مارتەبەسىنە قاراماستان كەز-كەلگەن جاعدايدا قاتىسا الادى جانە وزدەرىنىڭ جەتىستىكتەرىن باعالايتىن تالىمگەرلەرمەن ارالاسادى. سونىمەن بىرگە، قاتىسۋشى كۇن سايىن ءوزىنىڭ فيزيكالىق جاعدايىن جاقسارتىپ، داعدىسىن دامىتا وتىرىپ، اينالاسىنداعىلارعا كومەگىن تيگىزە الادى. قازىرگى جاعدايدا ادامنىڭ جەتىستىگى تەك قانا كاسىبي دەڭگەيدە عانا ەمەس.  جۇمساق داعدىلاردىڭ soft skills (ەموسيونالدى ينتەللەكت، كوشباسشىلىق، جاۋاپكەرشىلىك، ءوزىن-وزى باسقارۋ، بەيىمدەلۋ جىلدامدىعى، ادەپتىلىك جانە ت.ب.) بولۋى مامانعا دەگەن سۇرانىستى، ونىڭ باسەكەگە قابىلەتتىلىگىن ارتتىرادى.  «ەلباسى مەدالى» باعدارلاماسى - قاتىسۋشىلاردىڭ وسىنداي قاسيەتتەرىن ارتتىرۋعا باعىتتالعان.

باعدارلاماعا قاتىسۋ ارقىلى جاستار ءوز ۋاقىتتارىن باسقارۋدى، الدىنا ماقسات قويۋدى جانە ولارعا جۇيەلى تۇردە قول جەتكىزۋدى ۇيرەنەدى؛ سالاۋاتتى ءومىر سالتىن ۇستاناتىن بولادى جانە ءوزىن-وزى ۇنەمى دامىتادى. كورسەتىلگەن ناتيجەلەر نەگىزىندە باعدارلاما قاتىسۋشىلارى التىن، كۇمىس جانە قولا مەدالدەرمەن ماراپاتتالادى.

قازاقستان رەسپۋبليكاسىنىڭ زاڭناماسىندا بەلگىلەنگەن ءتارتىپ بويىنشا، ەگەر جيناعان باللى وزگەلەرمەن تەڭ بولعان جاعدايدا،  «ەلباسى مەدالىنىڭ» يەگەرلەرى ءبىلىم گرانتىن الۋعا،  سونىمەن قاتار جوعارى ءبىلىمى بار كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسى بويىنشا ءبىلىم الىپ جاتقانداردىڭ قۇرامىنا ەنۋگە قۇقىلى.  باعدارلاماعا قاتىسۋ ءۇشىن me.fpp.kz سايتىندا تىركەلۋ قاجەت.